Ich ha geschder mini SK deheime gloh und Tiggeds im C kauft zem dr Match emol entspannt könne z'beobachte. Und ich muess sage, mr bekunnt vyll mehr mit als uss dr MK well mr nid ständig vo Kollege abglänggd isch oder e Fahne vor dr Schnurre het (Achtung, nüd gege d'MK im Ganze).
Jedefalls het mi dr Alex in dr 1. HZ e weneli Luschdlos dunggd. Isch wenig gseggled und het nid so sin Kampf an Daag gleggd wie normal. 2. HZ einiges besser gsi.
Vom Däge bi ich aifach nur entsetzt. E sone Gazälle wo aifach nid ka voruss dängge und ständig blind ine Gegespiiler lauft. Abgeh, bzw. max. als Backup fyr die 2. Mannschaft.
Überrascht bini vom Kovac gsi. Super Stelligsspiil und sicher 3-4 x uff dr Siite uffgruumt (well dr Däge im Mittelfäld dr Ball wieder verstolpered het). Klar isch är nimm dr schnellschd, aber gege Thun längd das no allewyyl. Abraham wieder souverän gsi, mit einige guete Bäll nach vorne. Dr ainzig gsi wo s'Spiil het könne vo hinde uffbaue.
Us em Mittelfäld isch aifach zwenig nach vorne ko. Was ich nid verstande ha isch das dailwyys 4 Spiiler in dr Spitze uff dr Ball gwartet hän...
Wenn dr Park e Vorstoss gmacht het isch gopferdeggel niemerd ume gsi wo ihm gholfe het. Das isch au e ärgernis gsi. (aber geile Topf!
)
Drfir ha mi fyr dr Andrischd mega gfreyt. Dä het im Gegesatz zem Zoua oder Däge fyr sy Alter no Talänt.
Dr Buess.... naja.... klar isch Jung, isch sin erschde Yysatz gsi etc. etc. aber irgendwie het är nid emol die aifache Päss ane beko... Mr wänn imene Joor nomol luege...
Ich ha mim Sitznochber nach em 3. x Pfiffe au gseit was är fyr e Bachel isch. Am aafang ha ichs no verstande wenn mr jewyyls 5 Aaläuf brucht zem dr Ball us em aigene Stroofruum z'beko (nach eme Abstoos notabene...). Aber irgendwenn aggzeptierts mr halt das gwissi spiiler technisch beschränggd sind und im Mittelfäld nid die Bewegig isch wo mr kenne.
Es isch halt e krasse Kontraschd zem Sunntig gsi (nid spiilerisch aber emotional). Ich glaub es isch au guet gsi zwm uffzeig das einigi uss dr 2. Reihe halt nid emol gege Thun könne bestoh. Wenn dr Abraham, Shaq und Xhaka wäg sind, sich dr Streller und dr Stocker verletze wirds rächt happig. Aber ich verdrau in unserer Transferabteilig.
:)
