I ha das do ufgschriebe gha im 2002 für es paar Kollege und für genau so Lüt, wo nid in dä Schxxxx-verein wänd. Viel Spass bim läse.
How to became "UNTAUGLICH" - A true story - written by John Clark
==================================================
So, i verzell dr jetzt mol dr ganzi Ablauf, wie ich dr Entschluss gfasst ha
nid in dä Verein (Militär) izträtte und wie i das agstellt ha. Also.... viel
spass bi däm Märli
Es war einmal vor langer, langer Zeit....
e 19 Jöhrige Muttenzer, wo sich vom Militär langsam het afoh distanziere. I
ha bim Kolleg scho gseh gha, wie dumm die Militärsieche do händ, will er us
Wuet s Dienstbüechli verrisse het. Und zuedäm het är au no us Schuelische
Gründ (Diplomprüefige) nid chönne (und au nid welle) an d Ushebig goh. Er
het se also müesse Absäge. Au das het denne wohl nid eso ganz passt.
Wo i denn mol gseh ha, wie sich die Militäris überhaupt nid ums Wohlergehe vo de Lüt kümmere, hets mer scho mol di erschti Kurve gäh, us däm usezcho. Und denne isch no irgendwenn no en witere Informationsobe gsi in Muttenz.
Dört het dr "Kadi" so richtig müesse dr Chef usehänge loh.. "Rueh".... "Anesitze"..... "Still do hinde!!"... chaschs dr jo so öppe vorstelle. Jo, und so ha i mi langsam derzue entschiede, irgendwie dä Club z miede.
Denn am Sunntig zobe, wo d Ushebig langsam nöcher cho isch, ha i mol d
Unterlage duregläse und ha gmerkt, i muess dr ärztlichi Bricht no usfülle
(Was für Krankheite ich scho gha ha, Operatione, Alllergie, Droge... etc.) Denn ha i mol gschriebe, dass mi Vater Härzkrank isch (Är het jo au e OPS gha, also nid gloge), ha gschriebe, dass ich Asthma ha (ha i früehner mol gha), dass ich allergisch uf mehreri Sache bi (Huusstaub, diversi Polle, etc.), dass ich kiff wie e Bagger (isch natürlig nid wohr) und dass ich pro Wuche mehrmols Spirituose zue mir nimm.
Also, am Ushebigstag bi i huerenervös gsi, chasch der jo vorstelle. I ha
müesse am 08.15 in Aarau gsi, ha also müesse am 05.30 ufstoh...... Stell dr
mol mini Luune vor, wo i gha ha... :-) Dörte sin mer denn in 5 Gruppene ufteilt
worde. S het gheisse, das alli, wo e ärztlichs Zügnis händ, in d Gruppe 1
göhnd. I ha zwar kei Zügnis gha, ha mi aber trotzdäm in d Gruppe 1
igschliche.
Denn hän mer alli zämme so e Braintescht gmacht (Synonym finde für Wörter,
optischs Dänke). Und noher isch di ärztlich untersuechig cho.. Zerscht hän
mir alli müesse in dr Gruppe zue dene 3 Ärzt inegoh. Dört händ die mit uns dr
Bewegigsapparat teschtet, d Auge und s Ghör. Noher het denn jede einzeln no
zue dene müesse. So am 11.20 am Morge bi denn ich dra cho. Meganervös bin i dört inegange... i ha gschwitzt.... "Eifach irgendwie wäg vo dene" ha i mir 3 Tag lang ins Hirni gspeicheret.
Dialog:
Arzt: Also Herr Clark, wo ischs Problem...???
Ich: (verängschtigte Blick vo unde uffe) Jo... also... vorallem in
Körperlicher Hisicht mach i mir sehr fescht Sorge um mini Gsundheit.. I ha
jo Asthma, muess vo däm här relativ viel Medikament näh (1. mol gloge). Denn ha i jo öpe au no die Allergie, wo mi au rächt viel ploge tüen. (2. mol gloge). Und zuedäm ha i au no immer hüfiger Migräne (3. mol gloge).
Arzt: Tja Herr Clark, was mache mer do? ................
Arzt überlegt megalang..................
Arzt: Sölle mer Sie untauglich schriebe????
Ich: (innerlich Jubelnd und tanzend, üsserlich dr armi Bueb :-) Jo, wenn sie
meine....
Arzt: Wäre sie aber in dr lag, Zivilschutz zleischte?
Ich: Jo doch, das sötti no drinn liege...
Arzt: Also herr Clark, denn sind sie jetzt UT (Stämpel ufs Papier). Mälde sie
sich dusse bim Herr.... X.... vom Zivilschutz. Schöne Tag no......
Ich: Ok... viele viele Dank...
Und so isch das gange.
Vo miner Gruppe sind doch 14 oder 15 Untauglich... stell dir das mol vor.......
und 20 sind mer gsi. So eifach isch das gange.... Tja.....
Wo chunsch sunscht scho soo an Aschlag wie bi minus 2 Grad bi gröschtem Piss im Dräck dr Arsch abzfrierre...und e Idiot hinter dir wo di die ganz Zyt aschreit...